ఉత్తర కోస్తాపై వాయుగుండం పంజా.. రాత్రికే తీరం దాటే ఛాన్స్!

విశాఖపట్నం, సెప్టెంబర్ 23: బంగాళాఖాతంలో కొనసాగుతున్న తీవ్ర వాయుగుండం (Deep Depression) ఉత్తర కోస్తా ఆంధ్ర–దక్షిణ ఒడిశా తీరాల వైపు వేగంగా కదులుతోంది. భారత వాతావరణ శాఖ (IMD) ప్రకారం ఇది సెప్టెంబర్ 23 రాత్రికి విశాఖపట్నం–గోపాల్‌పూర్ మధ్య, కళింగపట్నం సమీపంలో తీరం దాటే అవకాశం ఉంది 

అధికారిక సూచనలు ఇవే: తీరప్రాంత ప్రజలు అత్యవసరం అయితే తప్ప బయటకు వెళ్లవద్దు. చెట్లు, విద్యుత్ స్తంభాలు, హోర్డింగులు, బలహీన నిర్మాణాలకు దూరంగా ఉండాలి. తీరప్రాంత రహదారులు, కచ్చా రోడ్లపై ప్రయాణాలను వీలైనంత వరకు నివారించాలి. ఉరుములు, మెరుపుల సమయంలో బయట ఉండకూడదు. విద్యుత్ అంతరాయాల కోసం మొబైల్ ఫోన్లు, పవర్ బ్యాంక్‌లను ముందుగానే ఛార్జ్ చేసుకోవడంతో పాటు తాగునీరు, అవసరమైన మందులు సిద్ధంగా ఉంచుకోవాలి.

రైతులకు ప్రత్యేక సూచనలు: పొలాల్లో నీరు నిల్వ కాకుండా కాలువలు, నీటి తూములను వెంటనే శుభ్రం చేయాలి. మోటార్లు, పైపులు, రేన్ గన్లు, ఇతర వ్యవసాయ పరికరాలను సురక్షితమైన ఎత్తైన ప్రదేశాలకు తరలించాలి. అరటి, బొప్పాయి వంటి ఉద్యాన పంటలు, చిన్న మొక్కలు గాలులకు పడిపోకుండా కర్రలతో మద్దతు ఇవ్వాలి. భారీ వర్షాల సమయంలో పొలాల్లోకి వెళ్లకుండా జాగ్రత్తలు తీసుకోవాలి.

 మత్స్యకారులకు కఠిన హెచ్చరిక: సెప్టెంబర్ 24 వరకు ఉత్తర ఆంధ్ర–దక్షిణ ఒడిశా తీరాల్లో సముద్రంలోకి వేటకు వెళ్లవద్దని అధికారికంగా సూచించారు. ఇప్పటికే సముద్రంలో ఉన్న పడవలు వెంటనే సురక్షిత ప్రాంతాలకు చేరుకోవాలి. కళింగపట్నం, భీమునిపట్నం, విశాఖపట్నం, గంగవరం, కాకినాడ పోర్టుల్లో లోకల్ కాషనరీ సిగ్నల్–III (LC-III) కొనసాగుతోంది. ప్రజలు స్థానిక అధికారుల సూచనలు, IMD తాజా హెచ్చరికలను తప్పనిసరిగా పాటించాలని అధికారులు సూచిస్తున్నారు.దీంతో శ్రీకాకుళం, విజయనగరం, విశాఖపట్నం తీర ప్రాంతాల్లో అప్రమత్తత పెంచారు. గాలులు, భారీ వర్షాలతో బిగ్ అలర్ట్: ఉత్తర ఆంధ్ర తీరంలో గంటకు సుమారు 46–56 కి.మీ వేగంతో ఈదురుగాలులు, గరిష్టంగా 74 కి.మీ వరకు గాలులు వీచే అవకాశం ఉందని IMD తీర బులెటిన్ పేర్కొంది. సముద్రం రఫ్ నుంచి వెరీ రఫ్‌గా మారే అవకాశం ఉంది. కోస్తా ఆంధ్రలో సెప్టెంబర్ 23న అత్యంత భారీ వర్షాలు, సెప్టెంబర్ 24న చాలా భారీ వర్షాలు, బలమైన ఉపరితల గాలులు నమోదయ్యే అవకాశం ఉందని IMD హెచ్చరించింది.