హైదరాబాద్: భారత్-వెస్టిండీస్ మధ్య అక్టోబర్ 14న హైదరాబాద్‌లో జరగనున్న టీ20 మ్యాచ్‌కు ఉప్పల్ స్టేడియాన్ని సిద్ధం చేస్తున్నామని హెచ్‌సీఏ కార్యదర్శి జీవన్‌రెడ్డి తెలిపారు. ఇటీవల జరిగిన బీసీసీఐ వార్షిక సర్వసభ్య సమావేశంలో పలు అంశాలపై చర్చించినట్లు వెల్లడించారు.
స్టేడియంలో ఉన్న ఎలక్ట్రికల్ సమస్యలన్నింటినీ పరిష్కరించామని, మ్యాచ్ నిర్వహణకు గ్రౌండ్ స్టాఫ్‌తో పాటు ఇతర సిబ్బందిని ప్రత్యేకంగా సిద్ధం చేస్తున్నామని చెప్పారు. ఈసారి ప్రభుత్వ హైస్కూళ్లకు చెందిన 2,000 మంది విద్యార్థులకు ఉచిత టికెట్లు అందించనున్నట్లు తెలిపారు.
ఉప్పల్ స్టేడియం ఔట్‌ఫీల్డ్‌లో ఉన్న వాటర్ లాగింగ్ సమస్యపై కూడా HCA దృష్టి సారించింది. డ్రైనేజీ వ్యవస్థను మార్చాలని నిపుణులు సూచించారని జీవన్‌రెడ్డి తెలిపారు. వచ్చే ఏడాది నాటికి స్టేడియంలోని అన్ని సమస్యలను పరిష్కరించేలా చర్యలు తీసుకుంటామని స్పష్టం చేశారు
. మహబూబ్‌నగర్, కరీంనగర్‌లోని గ్రౌండ్లు సిద్ధంగా ఉన్నాయని, అక్కడ రెండు క్రికెట్ అకాడమీలను ప్రారంభించడంతో పాటు అవసరమైన మౌలిక వసతులు కల్పించాలని నిర్ణయించినట్లు చెప్పారు. కొత్త స్టేడియాల నిర్మాణానికి భూమి కేటాయింపులు జరిగితే పనులు ప్రారంభిస్తామని వెల్లడించారు. కొత్త స్టేడియాలు నిర్మించే రాష్ట్రాలకు బీసీసీఐ సహకరిస్తుందని సూచించినట్లు తెలిపారు.
Comments
Sign in with Google to comment.