హైదరాబాద్: గణేష్ నిమజ్జనం.. వేలాది మంది భక్తులు, భారీ జనసందోహం.. ఎలాంటి అవాంఛనీయ ఘటనలు జరగకుండా శాంతిభద్రతలు కాపాడాల్సిన కీలక బాధ్యత పోలీసులపై ఉంటుంది.
కానీ హైదరాబాద్ ఉప్పల్‌లో కనిపించిన కొన్ని దృశ్యాలు ఇప్పుడు తీవ్ర చర్చకు దారితీశాయి. నిమజ్జన వేడుకల్లో ప్రజలు ఉత్సాహంగా పాల్గొంటుండగా.. కొంతమంది పోలీసులు కూడా డ్యూటీని పక్కన పెట్టి ఆటపాటల్లో మునిగిపోయినట్లు కనిపిస్తున్న వీడియోలు వైరల్ అవుతున్నాయి. ఉల్లాసంగా స్టెప్పులు వేసినా పోలీసుల తీరు సోషల్ మీడియాలో చర్చనీయాంశంగా మారింది
“బందోబస్తు కోసం వచ్చిన పోలీసులే ఇలా చేస్తే.. భద్రతను ఎవరు చూస్తారు?” అంటూ నెటిజన్లు ప్రశ్నలు సంధిస్తున్నారు. నిమజ్జనం సందర్భంగా ట్రాఫిక్ నియంత్రణ, భారీ జనసందోహాన్ని పర్యవేక్షించడం, అత్యవసర పరిస్థితులను ఎదుర్కోవడం వంటి బాధ్యతలు పోలీసులపై ఉన్న నేపథ్యంలో ఈ దృశ్యాలపై విమర్శలు వ్యక్తమవుతున్నాయి.
అయితే వైరల్ అవుతున్న వీడియోలో కనిపిస్తున్న సందర్భం, పోలీసులు నిజంగా విధుల్లో ఉన్నారా లేదా విరామ సమయంలో ఉన్నారా అన్నది అధికారికంగా స్పష్టత రావాల్సి ఉంది. వీడియో ఆధారంగా మాత్రమే పోలీసులపై తుది నిర్ధారణకు రావడం సరికాదన్న అభిప్రాయాలు కూడా వ్యక్తమవుతున్నాయి.
వైరల్ వీడియోపై ఉన్నతాధికారులు స్పందిస్తారా? పోలీసుల విధి నిర్వహణపై వివరణ ఇస్తారా? అన్నది ఇప్పుడు ఆసక్తికరంగా మారింది.
Comments
Sign in with Google to comment.