హైదరాబాద్: గణేశ్ నిమజ్జన శోభాయాత్ర నేపథ్యంలో హైదరాబాద్ నగరంలో ట్రాఫిక్ ఆంక్షలు కొనసాగుతున్నాయి. ట్యాంక్‌బండ్, ఎన్టీఆర్ మార్గ్, నెక్లెస్ రోడ్, లిబర్టీ, మోజంజాహీ మార్కెట్ తదితర ప్రాంతాలకు లక్షలాది మంది భక్తులు తరలిరావడంతో వాహనాల రాకపోకలు మందగించాయి. దీంతో నిమజ్జన ప్రక్రియ కొంత ఆలస్యమవుతోంది.
నిన్నటి నుంచి శోభాయాత్ర ప్రశాంత వాతావరణంలో వైభవంగా కొనసాగుతోందని హైదరాబాద్ సిటీ పోలీసులు తెలిపారు. ఎలాంటి అవాంఛనీయ ఘటనలు చోటుచేసుకోకుండా ప్రజలు సహకరిస్తున్నందుకు పోలీస్ శాఖ కృతజ్ఞతలు తెలిపింది.
నేడు మధ్యాహ్నం వరకు శోభాయాత్ర కొనసాగే అవకాశం ఉందని పోలీసులు వెల్లడించారు. విగ్రహాల నిమజ్జనాన్ని వీలైనంత త్వరగా పూర్తి చేసేందుకు పోలీసు, ట్రాఫిక్ సిబ్బంది నిరంతరం పనిచేస్తున్నారు.
ఈ ప్రాంతాల్లో సాధారణ వాహనాలకు నో ఎంట్రీ ట్యాంక్‌బండ్, నెక్లెస్ రోడ్, ఎన్టీఆర్ మార్గ్, పీవీ స్టాచ్యూ, ఇందిరాగాంధీ రోటరీ పరిసరాల్లో విగ్రహాల రద్దీ కారణంగా సాధారణ వాహనాలకు అనుమతి లేదని పోలీసులు స్పష్టం చేశారు.
అత్యవసరమైతే తప్ప ప్రజలు ఈ మార్గాల్లో ప్రయాణాలను వాయిదా వేసుకోవాలని, అవసరమైతే ప్రత్యామ్నాయ మార్గాలను ఎంచుకోవాలని సూచించారు. ప్రధాన రహదారులపైకి అనవసరంగా వాహనాలతో వచ్చి ట్రాఫిక్‌లో చిక్కుకోవద్దని హైదరాబాద్ సిటీ పోలీసులు విజ్ఞప్తి చేశారు
. ట్రాఫిక్ విభాగం ఎప్పటికప్పుడు విడుదల చేసే అధికారిక అడ్వైజరీలు, సూచనలను గమనిస్తూ నగర ప్రజలు పోలీసులకు పూర్తిస్థాయిలో సహకరించాలని హైదరాబాద్ పోలీస్ కమిషనర్ వీసీ సజ్జనర్, కోరారు.
Comments
Sign in with Google to comment.