పాక్‌ జే-35కు చెక్‌ పెట్టేందుకు భారత్‌ భారీ స్కెచ్‌? రంగంలోకి రష్యా ఎస్‌యూ-57!

న్యూఢిల్లీ: పాకిస్థాన్‌ చైనా నుంచి జే-35 ఐదో తరం స్టెల్త్‌ ఫైటర్‌ జెట్లను సమకూర్చుకునేందుకు ప్రయత్నిస్తున్న వేళ.. భారత్‌–రష్యా మధ్య మరో కీలక రక్షణ చర్చ తెరపైకి వచ్చింది. రష్యా అత్యాధునిక ఎస్‌యూ-57 ఐదో తరం యుద్ధవిమానాలను భారత్‌కు విక్రయించే ప్రతిపాదన ఇప్పుడు వ్యూహాత్మకంగా ప్రాధాన్యం సంతరించుకుంది

. బ్రిక్స్‌ సదస్సు సందర్భంగా రష్యా అధ్యక్షుడు వ్లాదిమిర్‌ పుతిన్‌ భారత్‌ పర్యటన నేపథ్యంలో ఎస్‌యూ-57 అంశం మరోసారి చర్చకు వచ్చింది. భారత్‌తో ఈ యుద్ధవిమానాల విక్రయంపై చర్చలు జరుగుతున్నాయని క్రెమ్లిన్‌ ప్రతినిధి దిమిత్రి పెస్కోవ్‌ సెప్టెంబర్‌ 8న వెల్లడించారు. దీంతో ఢిల్లీ–మాస్కో రక్షణ భాగస్వామ్యంపై మరోసారి ఆసక్తి పెరిగింది.

ప్రస్తుతం భారత వాయుసేన వద్ద ఆపరేషనల్‌ ఐదో తరం ఫైటర్‌ జెట్‌ లేదు. స్వదేశీ అడ్వాన్స్‌డ్‌ మీడియం కంబాట్‌ ఎయిర్‌క్రాఫ్ట్‌ (AMCA) ప్రాజెక్టు వేగంగా ముందుకు సాగుతున్నప్పటికీ, పూర్తి స్థాయి సేవల్లోకి రావడానికి ఇంకా సమయం పట్టే అవకాశం ఉంది. ఈ గ్యాప్‌ను భర్తీ చేసేందుకు పరిమిత సంఖ్యలో ఎస్‌యూ-57లను వేగంగా అందించాలన్నది రష్యా ప్రతిపాదనగా కనిపిస్తోంది.

 స్టెల్త్‌ డిజైన్‌, అధునాతన సెన్సర్లు, సుదూర ఆయుధాలను మోసుకెళ్లే సామర్థ్యం, అధిక వేగం, చురుకుదనం వంటి లక్షణాలు ఎస్‌యూ-57కు ఉన్నాయని రష్యా చెబుతోంది. అంతేకాకుండా భారత్‌లోనే ఉత్పత్తి, సాంకేతిక సహకారం, టెక్నాలజీ ట్రాన్స్‌ఫర్‌ వంటి అంశాలతో ప్రతిపాదనను ఆకర్షణీయంగా మార్చే ప్రయత్నం జరుగుతోంది.